ཁྱེད་ཀྱི་གནས་ཡུལ་ནི། མདུན་ཤོག > སློབ་གསོ། > བྱིས་པའི་སློབ་གསོ།

རྒྱལ་ཡོངས་བོད་ཁུལ་གྱི་བྱིས་པ་དང་སློབ་གྲྭ་ཆུང་འབྲིང་གི་སྐད་གཉིས་ཀློག་དེབ་ཐོག་མ་འགྲེམ་སྤེལ་བྱས།

སྤེལ་དུས། 2015-09-24 19:17:08  རྩོམ་ཁུངས། མཚོ་སྔོན་བོད་རིགས་དྲ་བ།  རྩོམ་པ་པོ། རིན་ཆེན་གྱིས་བསྒྲིགས།  ཀློག་གྲངས།

ཉེ་ཆར། སི་ཁྲོན་ཞིང་ཆེན་རྔ་བ་ཁུལ་བོད་ཡིག་རྩོམ་སྒྱུར་ཅུས་ཀྱིས་རྩོམ་སྒྱུར་བྱས་པའི་བྱིས་པ་དང་སློབ་གྲྭ་ཆུང་འབྲིང་གི་སྐད་གཉིས་ཀློག་དེབ༥༦འདི་སི་ཁྲོན་མི་རིགས་དཔེ་སྐྲུན་ཁང་གིས་པར་སྐྲུན་འགྲེམ་སྤེལ་གནང་།
སྤྱིར་ན་རྒྱལ་ཡོངས་སུ་བྱིས་པ་དང་སློབ་གྲྭ་ཆུང་འབྲིང་གི་སྐད་གཉིས་ཀློག་དེབ་ཆ་ཚང་ཞིག་མེད་པས། ༢༠༡༤ལོའི་ཟླ༩བར། རྔ་བ་ཁུལ་ཨུ་དང་ཁུལ་སྲིད་གཞུང་གིས་གནད་དོན་དེར་དམིགས་ཏེ་སྐད་གཉིས་ཀློག་དེབ་རྩོམ་སྒྱུར་བྱེད་པའི་འགོ་ཁྲིད་ཚན་ཆུང་བཙུགས་ཤིང་། རྔ་བ་ཁུལ་བོད་ཡིག་རྩོམ་སྒྱུར་ཅུས་ཀྱིས་འགོ་ཁྲིད་དེ། རྒྱལ་ཡོངས་བོད་ཁུལ་དུ་བྱིས་པ་དང་སློབ་གྲྭ་ཆུང་འབྲིང་གི་སྐད་གཉིས་ཀློག་དེབ་རྩོམ་སྒྱུར་བྱེད་པའི་འགོ་བརྩམས།
རྩོམ་སྒྱུར་བྱེད་པའི་སྐབས་སུ་རྩོམ་སྒྲིག་ཚན་ཆུང་དང་ལོ་ཙཱ་ཚན་ཆུང་། དཔེ་རིས་ཚན་ཆུང་། སློབ་གྲྭ་ཆུང་འབྲིང་གི་ཚན་ཚུང་བཅས་ཚན་ཆུང་བཞི་རུ་བགོས་ཤིང་། རྩོམ་སྒྱུར་བྱེད་པའི་གོ་རིམ་ཁྲོད་དུ་ད་དུང་སློབ་གསོ་པུའུ་ཡིས་གཏན་འཁེལ་བྱས་པའི¡¶ལོ་གསུམ་ནས་དྲུག་བར་གྱི་བྱིས་པའི་སློབ་སྦྱོང་དང་ཡར་རྒྱས་ཐད་ཀྱི་མཛུབ་སྟོན¡·ཞེས་པར་གཞིར་བཟུང་ནས། གསོན་ཉམས་ལྡན་ཞིང་གོ་སླ་ལ། བྱིས་པའི་བློ་ཁམས་དང་འཚམ་པ། བོད་རིགས་རང་ཉིད་ཀྱི་རིག་གནས་ཁྱད་ཆོས་འབུར་དུ་ཐོན་པར་མ་ཟད། ད་དུང་ཡུལ་སྲོལ་གོམས་གཤིས་དང་ཡང་མཐུན་པའི་ཀློག་དེབ༥༦འདི་རྩོམ་སྒྱུར་བྱས།

 

རྩོམ་སྒྲིག་ཚན་ཆུང་གིས་བྱིས་པའི་གྲངས་རིག་ཨ་མའི་མཛུབ་རྩིས་དང་།ཀ་མད་སུམ་ཅུའི་རྩེད་འཇོ།བྱིས་སྒྲུང་པདྨའི་དགའ་ཚལ།བྱིས་པའི་མིག་གི་དགའ་སྟོན།དྲི་བ་འབུམ་ཕྲག་མ་སོགས་ཀློག་དེབ༡༣རྩོམ་སྒྲིག་བྱས་ཤིང་། བྱིས་པ་ཚོས་ཀློག་དེབ་འདི་དག་ལ་ལྟ་ཀློག་བྱས་ན། རྩེད་འཇོའི་ཁྲོད་ནས་གྲངས་ཀ་དག་དང་། གསལ་བྱེད་སུམ་ཅུ། གནའ་གཏམ། འཚོ་བ་དང་རང་བྱུང་ཁམས་ཀྱི་ཤེས་བྱ་དག་ཡིད་ལ་ངེས་ཐུབ་པ་དང་། དགའ་སྤྲོའི་ཀློང་ནས་ཁོ་ཚོའི་སློབ་སྦྱོང་གི་མོས་པ་བསྐྱེད་ཐུབ།

 

ལོ་ཙཱ་ཚན་ཆུང་གིས་བྱིས་པའི་བློ་སྒོ་འབྱེད་པའི་དཔེ་ཚོགས་དང་། བྱིས་པའི་ནུས་པ་སྐྱེད་སྲིང་སྐོར་གྱི་དཔེ་ཚོགས་སོགས་རྒྱལ་ཁབ་ཕྱི་ནང་གི་སྐད་གྲགས་ཆེ་བའི་ཀློག་དེབ༣༠བོད་ཡིག་ཏུ་བསྒྱུར་ཡོད། ཀློག་དེབ་ཡོངས་ཀྱི་ཚོན་མདངས་གསལ་ལ་རི་མོར་སྤྲོ་སྣང་ལྡན་པས། བྱིས་པའི་ནུས་པ་སྐྱེད་སྲིང་བྱེད་པ་དང་མཉམ་དུ། དགའ་སྤྲོ་བདེ་སྐྱིད་ཀྱི་ངང་ནས་ཁོ་ཚོར་འཚར་ལོངས་རྒྱས་སུ་འཇུག་ཐུབ།

དཔེ་རིས་ཚན་ཆུང་གིས་ངའི་མིག་ལམ་གྱི་འཇིག་རྟེན་དང་།ལྕོང་ཕྲུག་གིས་ཨ་མ་འཚོལ་བ།མཐུན་པ་སྤུན་བཞི།ཕ་དང་བུ།སན་མའོ་ཡི་འཚོ་བ་གསར་བ་སོགས་ཀློག་དེབ༡༠རྩོམ་སྒྲིག་བྱས་ཤིང་། ཀློག་དེབ་འདི་ཚོའི་ནང་དུ་མཛེས་ཤིང་ལྟ་ན་སྡུག་པའི་རང་བྱུང་ཁམས་དང་། རོགས་རམ་བྱམས་སྐྱོང་གི་གོམས་སྲོལ་བཟང་བོ། ཟོལ་མེད་རྣམ་དག་གི་ཕ་བུའི་བརྩེ་དུང་སོགས་ཡིག་རིས་ཟུང་དུ་སྦྲེལ་ནས་བྱིས་པ་ཚོའི་མིག་མདུན་དུ་བཤམས་ཡོད་པས། བྱིས་པ་ཚོར་བཞད་གད་ལྷུག་ལྷུག་སློང་ཞིང་གསུབ་དཀའ་བའི་བག་ཆགས་ཟབ་མོ་ཞིག་འཇོག་ཐུབ་པར་གདོན་མི་ཟ།

 

སློབ་གྲྭ་ཆུང་འབྲིང་གི་ཚན་ཆུང་གིས་བོད་ཀྱི་རྩོམ་པ་པོ་གྲགས་ཅན་ཨ་ལེགས་ཀྱི་བརྩམས་ཆོས་ཏེ།《ལས་དབང》དང་《སྐྱ་ལམ་ཀྱག་ཀྱོག》《གསོམ་པ། སྟག་པ། ཤུག་པ》བཅས་བོད་ཡིག་ཏུ་བསྒྱུར་ཞིང་། སྒྲུང་གཏམ་འདི་རྣམས་ཚིག་སྦྱོར་ཕུན་སུམ་ཚོགས་ཤིང་ནང་དོན་གོ་སླ་ལ། སྒྲུང་གཏམ་གྱི་ནང་དུ་མི་དང་མིའི་བར་གྱི་འབྲེལ་བ་དང་། མི་རྣམས་ཀྱིས་རི་ལུང་བར་གྱི་སྐྱ་ལམ་ཀྱག་ཀྱག་འགྲིམ་པའི་འཚོ་བ་མཇུག་རྫོགས་ཚུལ། ནགས་ཀླུང་ལ་གཏོར་བརླག་ཐེབས་ཚུལ་བཅས་བྲིས་ཡོད་པས། སློབ་གྲྭ་ཆུང་འབྲིང་གི་སློབ་མའི་འདོད་བློ་སྐོང་ཐུབ་ངེས།
མཇུག་མཐར། བྱིས་པའི་བློ་སྒོ་འབྱེད་བྱེད་ཀྱི་གསར་གྱི་ལྡེ་མིག་ལྟ་བུའི་སྐད་གཉིས་ཀློག་དེབ་འདི་དག་གིས་བོད་རིགས་བྱིས་པ་ཚོ་བདེ་ཐང་ངང་ནས་འཚར་ལོངས་རྒྱས་པར་ཕན་པ་རེ་འབྱུང་བར་སྨོན།


རྔ་བ་ཁུལ་བོད་ཡིག་རྩོམ་སྒྱུར་ཅུས།
༢༠༡༥ལོའི་ཟླ༩བའི་ཚེས༢༡ཉིན།

 

ཉེ་བའི་གསར་བསྒྱུར།